Темір өндіріп-өңдеп шыңдаған, ұсталықты кәсіп қылған көшпелі, қуатты, ат ойнатып, тарих төріне шығып, төңірегіне тұтасымен ықпал еткен, ауыздығымен алысқан арғымақтармен алыс аймақтарға жауынгер­лік жорықтар жасаған,теміршілік-ұсталықты құрметті ата кәсібіне айнал­дырған халықтың ұлдары бүгінгі күні бейбіт еңбек майданында заманына лайықты ерлік көрсетіп, айбынын асырып жүр.

Солардың бірі «Oil Construction Company» жауапкершілігі шектеулі серіктестігі Қаламқас құрылыс-құрастыру қызметінің 5-дәрежелі электргазбен пісірушісі Ғалымбек Асқарұлы Құлшанаев «ҚазМұнайГаз» ҰК АҚ еншілес компаниялары арасында өткен «Үздік маман – 2018» байқауында 1-орынды жеңіп алды.

Қаратауды жағалай жеміс-жидегі төгілген жасыл желекке малынып, көркі алыстан көз тартатын әсем ауыл Шайырда туып-өскен Ғалымбек Асқарұлы еңбек жолын кеңшардың гаражында бастап, Шетпедегі кәсіптік-техникалық училищеден мамандық алғаннан кейінон бес жылдан бері компанияда еңбек етіп келеді. Үстіміздегі жылдың наурыз айында теориялық білімі мен практикалық машықтары тарифтік-біліктілік комиссияда қаралып, 5-дәрежеге қол жеткізген болатын. Сол кезден бастап өзінің білімін толықтырып, шабандардай қамшылатпай, шеберлігін шыңдай түсуге ден қойды. Ұстаны соққан пышағынан танитынындай өз ісіне епті, намысын қолдан бермейтін қолы ұста, сөзі қысқа жігітті жазбай танып, Серіктестіктің Бас пісірушісіҒабдулхамит Ғаниев-Хамидуллин тәлімгерлік жасап, Бекзат Ораш, Ержан Қоразов сынды пісіру шеберлері жұмысты бірге жасасып, өздерінен асқан майталман маман етіп тәрбиелеп шығарды. Екі ұштыны бір күшті қосатынының айғағы іспеттес екі құбырдың басын бір-біріне жалғап бір тұтас дүниеге айналдырған пісірушінің жұмысы жетіліп, жаңа сапалық деңгейге көтерілді. Ғалымбек Компания басшысы Серік Әбденовтың бастамасымен Жетібай кен орнында ұйымдастырылған «International Safety Standard» жауапкершілігі шектеулі серіктестігінің техникалық кәсіппен айналысатын жұмысшылардың біліктілігін арттыру курсында білімін шыңдап,  практикалық машықтанудан өткен болатын. Қазіргі таңда компания пісірушілері Lincoln Electric «Vantaqe-500»пісіру агрегаты, ESAB «Warrior-500» пісіру аппараттарында жұмыс істейді, әлемдік стандарттарға сай сапалы қызмет көрсетуге мол мүмкіншілік алды. Әр пісіруші өзі орындаған пісіру жігі үшін жеке жауапкершілікті көтереді, әр жікке жеке таңбасынбасады.

Жастайынан еңбектің көзін тапқан Ғалымбек бақыттың өзін де тапты. Осықарапайым, еш артық әңгімесі жоқ ісіне мығым,темірге тіл, жаңқаға жан бітіретін жігіттің ұжым мүшелері арасында беделі зор. Жан жары Жұпар Мүймсатқызымен бірге Асқар Бек, Бағлан, Гүлзар, Ұлан атты перзенттерін өсіріп, үлгілі отбасы түтінін түзу түтетіп отыр. Өнерлінің өрісі ұзақ екенін көрсетіп, осындай еліміздегі ең ірі мұнай-газ ұйымының еншілес компаниялары арасында өз ісінің қас шебері ретінде ең жоғарғы марапатқа ие болды. Компаниядаалған білімі мен біліктілігі арқасында қайратына әдісін жолдас етіп, шеберліктің додасында салқынқандылықпен және өзіне деген нық сеніммен жеңіс тұғырына көтерілді. 

Қару күшті емес, қару ұстаған күшті дегендей кәсіпті меңгеріп, оны асқан шеберлікпен ұстанған Ғалымбек Асқарұлындай мамандық иелеріадал еңбегімен көпке үлгі және ыстық ілтипат, зор құрметке лайық.

Жеңісің құтты болсын, Ғалымбек! Еңбегің жанып, табыстан табысқа жете беруіңе тілектеспіз!